Өнөөдөр бид өдөр тутмын хэрэглээндээ шүдний оо ашиглахдаа фтор агуулсан эсэхийг ихэвчлэн анзаардаггүй. Гэвч интернэт, мэдээллийн эрин үед фторын талаар олон талын мэтгэлцээн өрнөж, энэ бодис хүний шүдний эрүүл мэндэд хэрхэн нөлөөлдөг тухай үзэл бодол хуваагдсаар байна. Тиймээс бид энэхүү маргаанд цэг тавих үүднээс фтор гэж юу болох, шүдний оонд заавал агуулагдах хэрэгтэй эсэх, ямар хэмжээнд байх ёстой, мөн хэтрүүлэн хэрэглэх нь ямар эрсдэл дагуулдаг талаар дэлгэрэнгүй мэдээлэл хүргэж байна.
ФТОР ГЭЖ ЮУ ВЭ?
Фтор бол байгалиасаа ус, хүнс, хөрс зэрэгт агуулагддаг эрдэс бодис юм. Энэ нь шүдний эрүүл мэндэд чухал ач холбогдолтой. Фтор нь шүдний пааланг бэхжүүлж, цооролтын эхэн үеийг зогсоож, шүдийг хамгаалдаг. Түүнчлэн, фтор нь хоол хүнс, ундаанаас авах боломжтой боловч шүдний оонд агуулагдах фтор нь шүдийг гадна талаас нь хамгаалахад онцгой үүрэг гүйцэтгэдэг.
Зарим улс орнуудад фторыг нийтийн усанд нэмдэг. Жишээ нь, АНУ-ын Нью-Йорк, Австралийн Сидней, Канадын Торонто зэрэг хотуудад фторыг ундны усанд нэмж, шүдний цоорлоос урьдчилан сэргийлэх арга хэмжээ авдаг. Харин Монголд ундны усанд фтор нэмдэггүй байна.
ФТОР ШҮДНИЙ ЭРҮҮЛ МЭНДЭД ЯАГААД ЧУХАЛ ВЭ?
Фтор нь шүдний пааланг гэмтэхээс хамгаалж, шүдний гадаргууг бат бөх болгож, цоорол үүсэхээс урьдчилан сэргийлдэг. Шүдний оонд агуулагдах фтор нь шүдний гадаргуу дээрх эрдэс бодисыг нөхөн сэргээж, шүдийг хүчиллэг орчноос хамгаалдаг тул шүдний эрүүл мэндийн хамгийн чухал хамгаалагчдын нэг гэж үздэг.
ФТОРЫН ТӨРЛҮҮД
Фторыг дараах үндсэн 3 төрөлд ангилж үздэг:
1. Sodium Fluoride (NaF): Энэхүү фтор нь шүдний оонд хамгийн түгээмэл хэрэглэгддэг бөгөөд шүдийг бат бэх болгож, цоорлоос сэргийлдэг. Энэ нь шүдний гадаргуу дээр хамгаалалтын бүрхүүл үүсгэж, шүдийг хүчил болон нянгийн нөлөөллөөс хамгаалдаг.
2. Stannous Fluoride (SnF₂): Stannous Fluoride нь зөвхөн шүдийг бэхжүүлж, цоорлоос хамгаалаад зогсохгүй олон нэмэлт давуу талуудтай. Энэ нь шүдний эргэн тойрон дахь нянг устгаж, буйлны өвчлөлөөс сэргийлэх үйлчилгээтэй. Мөн шүдний мэдрэмтгий байдлыг багасгаж, амны хөндийд байрлах нянгийн үржил, товруу үүсэхээс сэргийлдэг. Тиймээс Stannous Fluoride нь шүдний оонд агуулагдах хамгийн үр дүнтэй орцын нэг бөгөөд олон талын хамгаалалтыг нэг дороос үзүүлж чаддаг.
3. Sodium Monofluorophosphate (Na₂PO₃F): Энэ төрлийн фтор нь мөн шүдийг бат бөх болгох үүрэгтэй ба шүдний гадаргууг хүчиллэг нөлөөнөөс хамгаалж, шүдний пааланг нөхөн сэргээхэд тусалдаг.
ФТОРЫН ЭРСДЭЛ БА ХЭТРҮҮЛЭН ХЭРЭГЛЭСНИЙ ҮР ДАГАВАР
Фтор нь шүд болон ясанд ашиг тустай боловч хэтрүүлэн хэрэглэхэд сөрөг үр дагаварт хүргэж болно. Хэрвээ фторын хэмжээ зохих хэмжээнээс хэтэрвэл шүдэнд флюороз буюу цагаан эсвэл бор толбо үүсэх эрсдэлтэй. Энэ нь ихэвчлэн бага насны хүүхдүүдэд илүү тохиолддог тул хүүхдүүдэд зориулсан оог зөв тунгаар хэрэглэх шаардлагатай.
ФТОРГҮЙ ОО ИЛҮҮ САЙН ГЭЖ ҮҮ?
Сүүлийн үед хүмүүс илүү байгалийн гаралтай, химийн бодис багатай бүтээгдэхүүн хэрэглэхийг эрмэлзэх болсон. Зарим нь фторгүй оо сонгох хандлагатай байдаг. Фторгүй оо нь аюултай биш ч, судалгаагаар фтор агуулсан оо нь шүдийг цоорлоос хамгаалахад илүү үр дүнтэй гэдэг нь нотлогдсон. Фторгүй оо нь шүдний гадаргууг цэвэрлэхэд тохиромжтой ч цоорлоос сэргийлэхэд хангалттай хамгаалалт өгдөггүй.
ДҮГНЭЛТ
Фтор нь шүдний эрүүл мэндийг хамгаалахад зайлшгүй шаардлагатай эрдэс бодис бөгөөд шүдний ооны найрлагад байх ёстой чухал бүрэлдэхүүн юм. Ялангуяа Stannous Fluoride агуулсан оо нь шүдийг цоорлоос хамгаалахаас гадна нянгийн эсрэг үйлчилгээ үзүүлж, буйлны эрүүл мэндийг хамгаалах, шүдний мэдрэмтгий байдлыг багасгах зэрэг олон давуу талтай. Stannous Fluoride-тай оо нь таны шүдийг илүү өргөн хүрээнд хамгаалж, амны хөндийн асуудлуудыг багасгахад үр дүнтэй байдаг тул, таны шүдний эрүүл мэндийг хамгаалахад оновчтой сонголт болно.
Тиймээс та дараагийн удаа оогоо сонгохдоо Stannous Fluoride агуулсан оог сонгон хэрэглэхийг зөвлөж байна. Энэ нь таны шүдийг илүү бат бөх болгож, эрүүл байдлыг удаан хугацаанд хадгалахад туслах төдийгүй шүдний мэдрэмтгий байдал, буйлны өвчнөөс сэргийлэхэд нэн тустай.